ചുറ്റും ? (കവിത)

കറുത്തു പോകുന്നു ചുറ്റും...

നിസ്സാഹയതയുടെ
ഒച്ചവെയ്ക്കാനാവാത്ത
കരച്ചിൽ.

കണ്ണീരിറ്റി
മറ്റൊയൊരാൾക്ക്
പടരാതിരിക്കാൻ
തുള്ളികൾ
തിരിച്ചെടുത്ത്
വരണ്ടു കരയുന്ന
കണ്ണുകൾ.

കരച്ചിലൊന്നും

പുറത്തറിയാതിരിക്കട്ടേയെന്ന

കരുതലുള്ള

സങ്കടം.

ചില്ലുജാലകത്തിനപ്പുറം

ദൂരക്കാഴ്ചയിൽ

ഒതുങ്ങുന്ന

നോട്ടങ്ങൾ.

ചില്ല് മുറിച്ചു കടക്കുന്ന

ഫിൽറ്റർ ചെയ്ത സ്നേഹം.

ദൂരെയല്ലാതെ

കാത്തുനിൽക്കുന്ന

മരണം.

ദുസ്സഹമായ

ഈ കാത്തിരിപ്പുണ്ടല്ലോ..

എല്ലായിടത്തേക്കും

ഒരു നൂൽപ്പാലം പണിത്

നടന്നോളൂ

എന്നുപറയുന്ന

ആ അവസ്‌ഥയുണ്ടല്ലോ...

കാത്തിരിപ്പിന്റെ

ആ കറുത്ത ചിരി

കാണാനും

കേൾക്കാനും

വയ്യ.

ചുറ്റും കറുത്തു പോകുന്നു.

_______