സിനിമ കൊട്ടക എന്ന പേര് തന്നെ നമുക്കിടയില്‍ നിന്നും മാഞ്ഞു കൊണ്ടിരിക്കുന്ന കാലഘട്ടമാണ് ഇത്, പുതിയ സാങ്കേതിക വിദ്യയുടെ കുത്തൊഴുക്കില്‍ സ്വാഭാവികമായും ഇല്ലാതാവുന്ന പലതില്‍ ഒന്നുമാത്രമാണ് ഇതെന്ന് നമുക്ക് ആശ്വസിക്കാം. മാത്രമല്ല ഈ സാങ്കേതിക വിദ്യ തന്നെ നമുക്ക് ലോക ക്ലാസിക്ക് സിനിമകള്‍ വിരല്‍ത്തുമ്പില്‍ എത്തിച്ചു തരുന്നു എന്നതും വളരെ നല്ല കാര്യം തന്നെ. അതുകൊണ്ടു തന്നെ സിനിമ കൊട്ടക എന്നത് നമുക്കിന്ന് ഗൃഹാതുരത്വം തരുന്ന ഓര്‍മയാണ്. ലോക ക്ലാസിക്ക് സിനിമകള്‍ എന്നും നമ്മുടെ നാട്ടിന്‍പുറങ്ങളില്‍ കടന്നു വരികയോ ജനങ്ങള്‍ക്കിടയില്‍ താല്‍പര്യം ജനിപ്പിക്കുകയോ ഉണ്ടാകാത്ത ഒന്നാണെന്ന കാര്യം മറച്ചു വെക്കുന്നില്ല. അതുകൊണ്ടു തന്നെ രാജ്കുമാറും അമിതാബച്ചനും, രാജനീകാന്തും, പ്രേംനസീറും, മമ്മൂട്ടിയും, മോഹന്‍ലാലും, തുടങ്ങി ഫഹദ് ഫാസിലും അല്ലു അര്‍ജ്ജുനും വരെയുള്ള എത്തി നില്‍ക്കുന്ന താരനിരയും അവരുടെ സിനിമകളും നാട്ടിന്‍പുറങ്ങളില്‍ പോലും നിറഞ്ഞോടുമ്പോള്‍ തന്നെ ലോകം മുഴുവന്‍ ചര്ച്ച ചെയ്യപ്പെടുന്ന സംവിധായകരുടെ സിനിമകള്‍ ഇന്നും നമ്മുടെ നാട്ടിന്‍പുറങ്ങളില്‍ അത്ര ചര്ച്ച ചെയ്യപ്പെടുന്നില്ല, ലോക ക്ലാസിക്കുകളായ സെവന്‍ത് സീല്‍, റെഡ് ബിയെര്‍ഡ്, ബാറ്റില്‍ഷിപ് പൊതംകിന്‍, നോസ്റ്റാള്‍ജിയ, ഇറാന്‍ സിനിമകള്‍, കിം കി ഡുക് സിനിമകള്‍, എന്തിന് ഇന്ത്യന്‍ ഇതിഹാസങ്ങളായ ഘട്ടക് സിനിമകള്‍, റേയുടെ ചിത്രങ്ങള്‍, മലയാളത്തിന്റെ മുഖം ലോകത്ത് എത്തിച്ച അടൂരോ അരവിന്ദനോ ഇവരുടെ ഒക്കെ എത്ര സിനിമകള്‍ നാട്ടിപുറങ്ങളില്‍ കണ്ടിട്ടുണ്ടാകും, ചര്ച്ച ചെയ്തിട്ടുണ്ടാകും.
എന്നാല്‍ ഇന്ന് ലോകം ഏറെ മാറികഴിഞ്ഞു, ലോകം വിരല്‍ത്തുമ്പില്‍ നിറഞ്ഞാടുകയാണ് ടോറന്‍റും മറ്റ് സൈറ്റുകളും നമ്മുടെ മുന്നില്‍ ഉണ്ട്, ലോക സിനിമകള്‍ കാണുന്ന ഒരു സമൂഹം ഇന്ന് വളര്‍ന്ന് വരുന്നു. ഒരു സംവിധായകനും ലോകത്തെ ഏത് ഭാഷയിലുള്ള സിനിമകളിലെ രംഗങ്ങളും പകര്‍ത്തി തന്റെ സിനിമയില്‍ ഉള്‍പ്പെടുത്താന്‍ പറ്റാത്ത കാലം അങ്ങിനെ ചെയ്താല്‍ ആ നിമിഷം സോഷ്യല്‍ നെറ്റ് വര്‍ക്ക് സൈറ്റുകളിലൂടെ ഉടനടി പ്രതികരിക്കുന്ന സമൂഹം. ഈവര്‍ക്കിടയിലേക്കാണ് പഴയകാല ഫിലിം സൊസൈറ്റി പ്രവര്‍ത്തനത്തിന്റെ മാതൃക പിന്‍പറ്റി ഇന്നും കൃതമായി പ്രവര്‍ത്തിക്കുന്ന ചങ്ങരംകുളം കാണി ഫിലിം സൊസൈറ്റിയുടെയും സിനിമകള്‍ കാണിക്കാന്‍ അവസരം നല്‍കുന്ന കൃഷ്ണ മൂവീസിന്റെയും പ്രസക്തി. ഇന്നും ബദല്‍ സാധ്യതകളിലൂടെ പ്രതീക്ഷകള്‍ കാണുന്ന ഒരു കൂട്ടത്തിന്റെ വലിയ പ്രവര്‍ത്തനമാണ് കാണി ഫിലിം സൊസൈറ്റി. ഒരു ചെറിയ സമൂഹത്തില്‍ ആണെങ്കില്‍ പോലും നല്ല സിനിമകളെ കണ്ടെത്തി അവ ജനങ്ങളെ കാണിച്ചു നല്ല കാഴ്ചയുടെ സംസ്കാരം വളര്‍ത്തി കൊണ്ടുവരാന്‍ ഫിലിം സൊസൈറ്റികള്‍ നല്കിയിട്ടുള്ള സംഭാവനകള്‍ വളരെ വലുതാണ്.
No comments:
Post a Comment