2025-ലെ അന്താരാഷ്ട്ര ഡിസൈൻ ദിനത്തിന്റെ തീം "ഔട്ട്ലാൻഡിഷ് ഒപ്റ്റിമിസം" ആണ്. ഈ തീം നെഗറ്റീവ് നാരേറ്റീവുകളിൽ നിന്ന് മോചിപ്പിക്കുകയും പോസിറ്റീവ് ഭാവിയെക്കുറിച്ച് ചിന്തിക്കുവാൻ പ്രേരിപ്പിക്കുകയും ചെയ്യുന്നു എന്നുകൂടി അർത്ഥമുള്ള എക്കാലത്തും, പ്രത്യേകിച്ച് ഈ കാലത്ത് ഏറെ പ്രസക്തമായ ആശയം. ഡിസൈൻ എന്നത് വെറും വാണിജ്യ താല്പര്യത്തെ പ്രദർശിപ്പിക്കാനുള്ള സൗന്ദര്യാത്മകമായ ഒരു പ്രവർത്തനമല്ല, മറിച്ച് സാമൂഹ്യപരിവർത്തനത്തിനുള്ള ഒരു ശക്തമായ ഉപകരണമാണ്. സംഘർഷങ്ങൾക്കെതിരെ പ്രതിരോധം നിർമ്മിക്കുന്നതിനും സമാധാനം പ്രോത്സാഹിപ്പിക്കുന്നതിനും ഡിസൈൻ എന്നും കല എന്ന അർത്ഥത്തിൽ പലപ്പോഴും ലോകത്തിനു മുന്നിൽ ശക്തമായ സൃഷ്ടികളിലൂടെ അവതരിപ്പിച്ച ചരിത്രം ഉള്ളതാണ്. വിവിധ തരത്തിലുള്ള കലാ സൃഷ്ടികളിലൂടെ നടത്തിയ പ്രതികരണങ്ങൾ, പ്രതിഷേധങ്ങൾ പ്രതിരോധങ്ങൾ ഒട്ടനവധി ഉണ്ടായിട്ടുണ്ട്. പിക്കാസോയുടെ പ്രശസ്തമായ ഗുർണിക്ക എന്ന പെയിന്റിംഗ്. എഴുപതുകളിലെ
വിയറ്റ്നാം യുദ്ധത്തിനെതിരെയുള്ള പോസ്റ്ററുകൾ അതിൽ എടുത്തു പറയേണ്ട സമാധാനത്തിന്റെ ഐക്കണായി മാറിയ. "വാർ ഈസ് ഓവ്!"എന്ന പോസ്റ്റർ, പോലീസ് ക്രൂരതയെതിരെ
പ്രതിഷേധത്തിനായുള്ള ഡിസൈൻ ആയി മാറിയ ഗ്രാഫിക്സിന്റെ ചലന രൂപമായ
ബ്ലാക്ക് ലൈവ്സ മാറ്റർ, ആണവ യുദ്ധത്തിന്റെ വേദനിക്കുന്ന ഓർമ്മയായി നിൽക്കുന്ന ഹിരോഷിമയിലെ 'പീസ് മെമ്മോറിയൽ പാർക്ക്' ഇങ്ങനെ ഉദാഹരണങ്ങൾ ഏറെയുണ്ട്. ഭീകരതയുടെയും സംഘർഷത്തിന്റെയും ഇരുട്ടിൽ നിന്ന് പുറത്തേക്കുള്ള കലാപരമായ ഒരു ദാർശനിക വഴിയാണ് ഇവയെല്ലാം.
കശ്മീരിലെ പഹൽഗാമിൽ നടന്ന ഭീകരാക്രമണം പോലെയുള്ള മനുഷ്യത്വത്തിനെതിരെയുള്ള ക്രൂരതയുടെ ഓർമ്മപ്പെടുത്തുമ്പോൾ, ഡിസൈന്റെ ശക്തി വഴി പ്രതിരോധവും പുനർനിർമ്മാണവും സാധ്യമാണെന്ന് ഈ തീം ഊന്നിപ്പറയുന്നു. ഭീകരതയുടെ ലക്ഷ്യം ഭയവും ആശങ്കയും നിറച്ച് വിദ്വേഷത്തിന്റെ വിത്ത് വിഷ വിതയ്ക്കുകയാണ്.
"ഔട്ട്ലാൻഡിഷ് ഒപ്റ്റിമിസം" എന്ന ആശയം വിഷാദത്തെ മറികടക്കാൻ ഡിസൈൻ ഉപയോഗിക്കാനാവശ്യപ്പെടുത്തുക എന്നതാണ്. ഉദാഹരണത്തിന്, സമാധാനപരമായ സന്ദേശങ്ങൾ പ്രചരിപ്പിക്കുന്ന പോസ്റ്റർ ഡിസൈനുകൾ, സാമൂഹ്യ ഐക്യം ശക്തിപ്പെടുത്തുന്ന പ്രകടന കലകൾ തുടങ്ങിയവ.
ഇന്ന് ലോകം ഒട്ടുമിക്കവാറും പ്രതിസന്ധികളാൽ ചുറ്റപ്പെട്ടിരിക്കുന്നു ഭീകരവാദം, യുദ്ധം, പരിസ്ഥിതി പ്രതിസന്ധി, രാഷ്ട്രീയ അസ്ഥിരത, സാമ്പത്തിക അസമത്വം തുടങ്ങിയവ. ഈ സാഹചര്യത്തിൽ, ഡിസൈൻ വഴി പ്രതീക്ഷയും പുത്തൻ ദർശനങ്ങളും സൃഷ്ടിക്കാനാകും എന്നതാണ് ഈ വർഷത്തെ തീമിന്റെ സന്ദേശം. ഉദാഹരണത്തിന്, സുസ്ഥിര ഡിസൈൻ (sustainable design), സാമൂഹ്യ നീതി പ്രോത്സാഹിപ്പിക്കുന്ന ആശയങ്ങൾ, ഫ്യൂച്ചറിസ്റ്റിക് ടെക്നോളജി ഡിസൈൻ തുടങ്ങിയവയിൽ ഈ ദിനം സ്വാധീനം നൽകുന്നു.
ഡിസൈൻ എന്നത് ചിത്രലിപി കാലം മുതലുള്ള മനുഷ്യന്റെ സാംസ്കാരിക പ്രയത്നമാണ്. ബൗഹാസ് (Bauhaus), ആർട്ട് ഡെക്കോ (Art Deco), മിനിമലിസം (Minimalism) തുടങ്ങിയവ ഡിസൈനെ എങ്ങനെ സാമൂഹ്യ പരിവർത്തനത്തിന് ഉപയോഗിച്ചു എന്ന് ചരിത്രം തെളിയിക്കുന്നു. 2025-ലെ ഈ തീം അത്തരം പരിവർത്തനങ്ങളുടെ തുടർച്ചയാണ് ഒരു പുതിയ ലോകം സൃഷ്ടിക്കാൻ ഡിസൈൻ എങ്ങനെ ഉപയോഗിക്കാം എന്നതിന്റെ പ്രതീക്ഷാബോധത്തോടെയുള്ള ആഹ്വാനം.
"ഔട്ട്ലാൻഡിഷ് ഒപ്റ്റിമിസം" എന്ന തീം പോളിഷ് ഗ്രാഫിക് ഡിസൈനർമാരുടെ അസോസിയേഷൻ (STGU) ആണ് മുന്നോട്ട് വെച്ചത്.അതിനോട് ഐക്യ ദാർഢ്യപ്പെട്ട് യുക്രേനിയൻ ഗ്രാഫിക് ഡിസൈനർ ഒലേന ട്വെർഡോഖ്ലിബ് രൂപകൽപ്പന ചെയ്ത പോസ്റ്റർ കൂടി ആയതോടെ അത് ലോക ശ്രദ്ധ നേടി
"ഔട്ട്ലാൻഡിഷ് ഒപ്റ്റിമിസം" ഭയത്തിന്റെയും സംഘർഷത്തിന്റെയും നിലവിലെ നാരേറ്റീവുകളെ വെല്ലുവിളിക്കുകയും, ഡിസൈനർമാരെ ഒരു ശ്രേഷ്ഠമായ ഭാവിയെക്കുറിച്ച് സ്വപ്നം കാണാൻ പ്രേരിപ്പിക്കുകയും ചെയ്യുന്ന ആശയമായി വളർന്നു.
ഈ തീം ഡിസൈനിൽ ഒരു പ്രതീക്ഷാബോധവും പോസിറ്റീവ് സമീപനവും പ്രോത്സാഹിപ്പിക്കാൻ ശ്രമിക്കുന്നു, യഥാർത്ഥ്യത്തെ പുനർരൂപകൽപ്പന ചെയ്യാനും മികച്ച ലോകങ്ങൾ സൃഷ്ടിക്കാനും ഡിസൈൻ ഒരു ഉപകരണമായി ഉപയോഗിക്കേണ്ടതുണ്ട്. .
സംഘർഷങ്ങൾക്കെതിരെ ഡിസൈൻ ഒരു 'മൗനമായ യുദ്ധം' നടത്തുന്നു. ചരിത്രം തെളിയിക്കുന്നത് പോലെ, ഡിസൈൻ ഒരു 'പ്രതിരോധമാവാനും പുനർനിർമ്മാണത്തിന്റെ ഭാഷയാവാനും കഴിയുമെന്നാണ്. എന്നാൽ രാഷ്ട്രീയ പ്രതിബന്ധങ്ങൾ, ഫണ്ടിംഗ് പ്രശ്നങ്ങൾ തുടങ്ങിയ വെല്ലുവിളികൾ നിലനിൽക്കുന്നു. ഭാവിയിൽ, ടെക്നോളജിയും സാമൂഹ്യ ബോധവും ചേർന്ന് ഡിസൈൻ സമാധാനത്തിനായുള്ള കൂടുതൽ ശക്തിയായി മാറും എന്ന് തന്നെ കരുതാം. ഇന്റർ നാഷണൽ ഡിസൈൻദിനത്തിന്റെ സ്ലോഗൺ പഹൽഗാമിലെ ഭീകരാക്രമണത്തിനു കൂടിയുള്ള പ്രതിരോധമാകുന്നത് അതിനാലാണ്. ഏതൊരു കലാ പ്രവർത്തകനും വെറുതെ ഇരിക്കാനാവില്ല. പലപ്പോഴും കലയിലൂടെ അത് പ്രവചനസ്വരത്തിൽ വെളിപ്പെടുത്തും.
---------------------
